ਅਸਟਰੀਆ (ਵੀਆਨਾ) ਦੀਆਂ ਵਿਸਾਖੀ ਖੇਡਾਂ

ਰਿਪੋਰਟ: ਹੈਪੀ ਮਾਨ

ਵੀਆਨਾ ੨੩ ਅਪ੍ਰੈਲ ਦਿਨ ਐਤਵਾਰ ਨੂੰ 'ਗੁਰਦੁਆਰੇ ਨਾਨਕਸਰ' ਸਾਧ ਸੰਗਤ ਵਲੋਂ ਵਿਸਾਖੀ ਦੀ ਖੁਸ਼ੀ ਵਿਚ ਚੌਥੀ ਵਾਰ 'ਕਬੱਡੀ' ਤੇ 'ਫੁਟਬਾਲ' ਦਾ ਟੂਰਨਾਮੈਂਟ ਇਕ ਸਟੇਡੀਅਮ ਕਿਰਾਏ ਤੇ ਲੈ ਕੇ ਕਰਵਾਇਆ ਗਿਆ। ਪਰ ਇਸ ਵਾਰ ਇੰਗਲੈਂਡ, ਜਰਮਨੀ ਤੇ ਇਟਲੀ ਦੀਆਂ ਕਬੱਡੀ ਟੀਮਾਂ ਨੂੰ ਵੀ ਬੁਲਾਇਆ ਗਿਆ। ਜਰਮਨੀ ਤੇ ਇਟਲੀ ਦੀਆਂ ਕਬੱਡੀ ਟੀਮਾਂ ਕੁਝ ਕਾਰਨਾਂ ਕਰਕੇ ਨਹੀਂ ਪਹੁੰਚ ਸਕੀਆਂ, ਪਰ ਇੰਗਲੈਂਡ ਇਲਫੋਡ ਦੀ ਕਬੱਡੀ ਟੀਮ ਪਹਿਲੀ ਵਾਰ ਤਿੰਨ ਦਿਨਾਂ ਲਈ ਬਹੁਤ ਖੁਸ਼ੀ ਨਾਲ ਹੁੰਮ-ਹੁੰਮਾ ਕੇ ਵੀਆਨਾ ਪਹੁੰਚੀ। ਫੁਟਬਾਲ ਮੈਚ ਲਈ ਅਸਟਰੀਆ ਦੇ ਇਕ ਸ਼ਹਿਰ 'ਡੁਚ ਵਾਗਰਮ' ਤੋਂ ਗੋਰਿਆਂ ਦੀ ਟੀਮ ਆਈ।

 

ਗੁਰਦੁਆਰਾ ਪ੍ਰਬੰਧਕਾਂ ਨੂੰ ਟੂਰਨਾਮੈਂਟ ਕਰਵਾਉਣ ਦਾ ਕਾਰਨ ਪੁੱਛਿਆ ਗਿਆ ਤਾਂ ਉਹਨਾਂ ਦੱਸਿਆ ਕਿ ਕਬੱਡੀ ਸਾਡੀ ਮੁੱਖ ਖੇਡ ਹੈ ਕਿਉਂਕਿ ਅਸੀਂ ਹੁਣ ਅਸਟਰੀਆ ਵਿਚ ਹੀ ਰਹਿਣਾ ਹੈ ਇਸ ਕਰਕੇ ਇੱਥੇ ਦੇ ਲੋਕਾਂ ਨੂੰ, ਆਪਣੀ ਆਉਣ ਵਾਲੀ ਪੀੜੀ ਨੂੰ ਅਤੇ ਨੌਜਵਾਨ ਪੀੜੀ ਨੂੰ ਆਪਣੇ ਕਲਚਰ ਬਾਰੇ ਦੱਸਣਾ ਚਾਹੁੰਦੇ ਹਾਂ। ਕਬੱਡੀ ਦੇ ਮੈਚ ਰਾਹੀਂ ਤਾਂ ਅਸੀਂ ਸ਼ੁਰੂਆਤ ਕੀਤੀ ਹੈ। ਕਬੱਡੀ ਮੈਚ ਰਾਹੀਂ ਅਸੀਂ ਆਪਣੇ ਕਲਚਰ ਨਾਲ ਜੁੜੇ ਰਹਿਣਾ ਚਾਹੁੰਦੇ ਹਾਂ। ਹੋਰ ਅਸੀਂ ਆਪਣੇ ਕਬੱਡੀ ਕਲੱਬ ਵੀ ਬਣਾਉਣਾ ਚਾਹੁੰਦੇ ਹਾਂ ਤਾਂ ਕਿ ਅਸੀਂ ਵੀ ਇੰਗਲੈਂਡ ਖੇਡਣ ਜਾਇਆ ਕਰੀਏ ਤੇ ਉਹਨਾਂ ਨੂੰ ਸੱਦਿਆ ਕਰੀਏ।

 

ਖੇਡਾਂ ਦੇਖਣ ਲਗਭਗ ੫੫੦ ਦੇ ਕਰੀਬ ਦਰਸ਼ਕ ਵੀਆਨਾ ਤੇ ਅਸਟਰੀਆ ਦੇ ਹੋਰ ਸ਼ਹਿਰਾਂ ਤੋਂ ਉਤਸ਼ਾਹ ਨਾਲ ਪਹੁੰਚੇ। ਦਰਸ਼ਕਾਂ ਨਾਲ ਗੱਲਬਾਤ ਕਰਨ ਨਾਲ ਪਤਾ ਲੱਗਾ ਬਹੁਤੇ ਦਰਸ਼ਕਾਂ ਨੇ ਪੰਜਾਬ ਵਿਚ ਕਬੱਡੀ ਖੇਡੀ ਹੋਣ ਕਰਕੇ ਉਹ ਵੀ ਨਾਲ ਖੇਡਣਾ ਚਾਹੁੰਦੇ ਸੀ ,ਪਰ ਸੱਟ ਲੱਗਣ ਦੇ ਡਰ ਤੋਂ,ਤੇ ਕੰਮ ਕਰਨ ਵਿਚ ਮੁਸ਼ਕਲ ਆਉਣ ਕਰਕੇ ਉਹ ਖੇਡ ਨਾ ਸਕੇ। ਕਈ ਦਰਸ਼ਕ ਬਹੁਤ ਖੁਸ਼ ਸਨ ਕਿਉਂਕਿ ਉਹਨਾਂ ਨੂੰ ਕਈ ਸਾਲਾਂ ਬਾਅਦ ਕਬੱਡੀ ਦਾ ਮੈਚ ਦੇਖਣ ਦਾ ਮੌਕਾ ਮਿਲਿਆ ਸੀ ਤੇ ਕੁਝ ਸਿਰਫ਼ ਇੰਗਲੈਂਡ ਕਬੱਡੀ ਮੈਚ ਦੇਖਣ ਆਏ ਸਨ। ਕਿਉਂਕਿ ਉਹਨਾਂ  ਸੁਣਿਆ ਸੀ ਕਿ ਇੰਗਲੈਂਡ ਕਬੱਡੀ ਟੀਮ ਬਹੁਤ ਸੋਹਣਾ ਖੇਡਦੀ ਹੈ। ਕੁਝ ਦਰਸ਼ਕਾਂ ਨੇ ਇੱਛਾ ਜ਼ਾਹਰ ਕੀਤੀ ਹੈ ਕਿ ਕਬੱਡੀ ਮੈਚ ਛੇਤੀ ਛੇਤੀ ਕਰਵਾਏ ਜਾਣੇ ਚਾਹੀਦੇ ਹਨ ਨਾ ਕਿ ਸਾਲ ਵਿਚ ਇਕ ਵਾਰੀ। 'ਇਲਫੋਰਡ ਕਬੱਡੀ ਕਲੱਬ' ਜੋ ਕਿ ਤਿੰਨ ਸਾਲਾਂ ਤੋਂ ਖੇਡ ਰਹੀ ਹੈ ਤੇ ਲਗਭਗ ਸਾਰੀ ਦੁਨੀਆ ਦੇ ਮੁਲਕਾਂ ਵਿਚ ਖੇਡ ਚੁੱਕੀ ਹੈ। ਪੰਜਾਬ ਵਿਚ ਮੰਨੀਆਂ ਹੋਈਆਂ 'ਹਕੀਮਪੁਰ' ਦੀਆਂ ਖੇਡਾਂ ਜਿਸ ਵਿਚ ਦੁਨੀਆ ਦੀਆਂ ਕਬੱਡੀ ਟੀਮਾਂ ਹਿੱਸਾ ਲੈਂਦੀਆਂ ਹਨ ਉੱਥੇ ਅਸੀਂ ਦੂਜੇ ਸਥਾਨ ਤੇ ਰਹਿ ਕੇ ੭੫੦੦੦ ਰੁਪਏ ਜਿੱਤੇ ਸਨ। ਜਦੋਂ ਉਹਨਾਂ ਨੂੰ ਪੁੱਛਿਆ ਗਿਆ ‘ਦੁਬਾਰਾ ਅਸਟਰੀਆ ਆ ਕੇ ਖੇਡਣ ਬਾਰੇ’ ਤਾਂ ਉਹਨਾਂ ਨੇ ਭਾਵੁਕ ਹੁੰਦਿਆਂ ਹੋਇਆ ਕਿਹਾ ਕਿ 'ਕਬੱਡੀ ਸਾਡੀ ਮਾਂ ਖੇਡ ਹੈ ਜਿਹੜੀ ਸਾਨੂੰ ਖੇਡਣ ਦਾ ਸੱਦਾ ਦੇਣਗੇ ਅਸੀਂ ਉਥੇ ਹਰ ਹਾਲਤ ਵਿਚ ਪਹੁੰਚਾਂਗੇ, ਕਬੱਡੀ ਦਾ ਨਾਂ ਸੁਣ ਕੇ ਸਾਡੇ ਡੌਲ਼ੇ ਫਰਕਣ ਲੱਗ ਪੈਂਦੇ ਹਨ।

 

ਉਹਨਾਂ ਨੇ ਗੁਰਦੁਆਰਾ ਨਾਨਕਸਰ ਦੀ ਸੰਗਤ ਦਾ ਆਉ ਭਗਤ ਲਈ ਬਹੁਤ ਬਹੁਤ ਧੰਨਵਾਦ ਕੀਤਾ ਤੇ ਉਹ ਬਹੁਤ ਖੁਸ਼ ਸਨ। ਵੀਆਨਾ ਫੁਟਬਾਲ ਟੀਮ ਨੇ ਡੁੱਚ ਵਾਗਰਮ ਟੀਮ ਨੂੰ ੭-੩ ਗੋਲਾਂ ਨਾਲ ਹਰਾਇਆ। ਕਬੱਡੀ ਮੈਚ ਦੌਰਾਨ ਇਲਫੋਰਡ ਟੀਮ ਕਾਫ਼ੀ ਅੰਕਾਂ ਦੇ ਅੰਤਰ ਨਾਲ ਜੇਤੂ ਰਹੀ। ਦਵਿੰਦਰ ਸਿੰਘ ਬਿੰਦਰ ਜਿਸ ਦੀ ਕੁਝ ਚਿਰ ਪਹਿਲਾਂ ਅਚਾਨਕ ਮੌਤ ਹੋਈ ਸੀ ਉਸਨੂੰ ਸ਼ਰਧਾਂਜਲੀ ਭੇਟ ਕੀਤੀ ਗਈ ਕਿਉਂਕਿ ਅਸਟਰੀਆ ਕਬੱਡੀ ਸ਼ੁਰੂ ਕਰਨ ਵਿਚ ਉਸ ਦੀ ਬਹੁਤ ਵੱਡੀ ਦੇਣ ਸੀ। ਜਗਤਾਰ ਸਿੰਘ ਓਰਫ਼ ਮਾਮਾ ਜੀ ਅਤੇ ਦਵਿੰਦਰ ਸਿੰਘ ਪਤਾਰਾ ਨੇ ਮੈਚ ਦੀ ਬਹੁਤ ਵਧੀਆ ਕੁਮੈਂਟਰੀ ਕੀਤੀ। ਦਰਸ਼ਕਾਂ ਨੇ ਦੋਵੇਂ ਕਬੱਡੀ ਟੀਮਾਂ ਦੀ ਤਾੜੀਆਂ ਨਾਲ ਹੌਸਲਾ ਅਫ਼ਜ਼ਾਈ ਕੀਤੀ।

info@jattsite.com